Welcome

阿妹做Marketing都半年，最近老細問佢：「你知唔知道你啲客係咩年齡層、咩性別？」
佢一面呆滯，拎出Google Analytics（GA）一睇——好似乜都有，又好似乜都冇，最多嘅竟然係「(not set)」，整個畫面灰晒。

點解會咁？原來GA要分析年齡、性別、興趣，係靠Google帳號嘅用戶數據。但問題嚟啦——唔係個個人都Login Google，又唔係個個人都比你Track，結果你個報告入面，就會見到一大堆「(not set)」，好似打咗格仔咁。

阿妹查Google Merchandise Store個案，見到最活躍嘅群組係18-24歲男仔，但「(not set)」竟然佔成7成！即係其實你根本唔知真正嘅客係邊批人，亂咁做策略，咪中伏囉。

咁點算好？師兄提佢幾招：

• 如果你做App或者會員制，盡量鼓勵用戶登入，收集埋佢哋Profile。
• GA唔夠準，可以用Facebook Pixel、TikTok Pixel等補足數據缺口，因為嗰邊係用自己平台login，精準好多。
• 或者試下做Survey，簡單問幾條問題，加強了解。

數據未必100%準，但你要識分邊啲可信、邊啲打折扣。最慘係，你以為你有數據，其實啲數據一半都唔work。
想靠GA了解客群，唔好盲信每條bar，睇埋後面邊啲係「(not set)」，做策略時要計埋個變數。

最後：「唔準嘅數據，比冇數據更危險。」
唔好見有Data就開心，一定要睇清楚背後有冇盲點！